इलामको रोङ गाउँपालिकाले कर्सोङ पदमार्गमा सरसफाइ अभियान सञ्चालन गरेसँगै उक्त क्षेत्रको पर्यटकीय आकर्षण थपिएको छ। मंगलबार सञ्चालन गरिएको श्रम अभियान अन्तर्गत पदमार्गमा पर्ने प्रसिद्ध गोगुल पइन्टबाट निन्दा खोला सम्म सरसफाइ गरी आकर्षक दृश्यावलोकन स्थल थप व्यवस्थापन गरिएको पालिका अध्यक्ष मनिकुमार स्याङ्बो सु्वासले बताउनुभएको छ ।
हिउँद याममा इलामका अधिकांश डाँडाकाँडाबाट जस्तै कर्सोङ पदमार्गबाट पनि कञ्चनजङ्घा हिमाल, भारतको दार्जेलिङ ,मिरिक, सिलगुडी, झापाका विभिन्न स्थान लगायतका मनोरम दृश्य अवलोकन गर्न सकिन्छ। घाम उदाउने र अस्ताउने बेला देखिने प्राकृतिक दृश्यका कारण यहाँ पछिल्लो समय घुम्न आउने पदयात्री तथा पर्यटकहरूको चाप बढ्दै गएको छ।
यो पदमार्ग मेचि राजमार्गबाट नजिकै पर्ने भएकाले सहज पहुँचका कारण पर्यटकका लागि आकर्षक गन्तव्य बन्दै गएको स्थानीयवासी बताएका छन्। सरसफाइ अभियानमा रोङ गाउँपालिका, सूर्योदय नगरपालिका, झापाको मेचि नगरपालिका लगायतका क्षेत्रका प्रतिनिधि, स्थानीय युवाहरू र विभिन्न संघसंस्थाका व्यक्तिहरूको सक्रिय सहभागिता रहेको थियो।
गाउँपालिकाका प्रतिनिधिहरूका अनुसार आगामी दिनमा पदमार्गको स्तरोन्नति, विश्रामस्थल निर्माण र प्रचार–प्रसारमा जोड दिइनेछ। यस कदमले कर्सोङ पदमार्गलाई इलामको नयाँ पर्यटकीय केन्द्रका रूपमा स्थापित गर्ने विश्वास गरिएको छ।
