कवि विमल गुरुङ स्मृति पुस्तकालयले २०८१ सालको ‘विमल गुरुङ कृति पुरस्कार’ पत्रकार तथा लेखक बसन्त बस्नेतलाई प्रदान गरेको छ। बस्नेतको उपन्यास ‘सिमसारा’ले सो वर्षको उत्कृष्ट कृति घोषित हुँदै पुरस्कार प्राप्त गरेको हो।
३४औँ राष्ट्रिय कविता महोत्सव तथा कवि विमल गुरुङको ५४औँ जन्मजयन्तीका अवसरमा बुधबार धरानमा आयोजित विशेष कार्यक्रममा बस्नेतलाई पुरस्कार हस्तान्तरण गरिएको थियो। कार्यक्रममा इतिहासकार तथा लालिगुराँस नगरपालिकाका मेयर अर्जुन माबुहाङ प्रमुख अतिथि र सिनेकर्मी नवीन सुब्बा विशेष अतिथि रहेका थिए।
कार्यक्रमका बीच पुस्तकालय सञ्चालक समितिले लेखक बस्नेतलाई दुई लाख रुपैयाँ नगद, ताम्रपत्र र दोसल्ला ओढाएर सम्मान गरेको हो।
पुस्तकालयका अध्यक्ष पूर्णबहादुर गुरुङका अनुसार पुरस्कारका लागि स्वदेश तथा विदेशमा रहेका नेपाली भाषी लेखक, साहित्यकार र सर्जकबाट १०४ कृति प्राप्त भएका थिए। तीमध्येबाट एत्किृष्ट १० कृति छनोटगरी अन्ततः बस्नेतको सिमसारालाई उत्कृष्ट ठहर गर्दै पुरस्कार प्रदान गरिएको उनले जानकारी दिए।
कार्यक्रममा लेखक भूषिता वशिष्ठले बस्नेतको जीवनयात्रा र योगदानबारे परिचयात्मक प्रस्तुति दिएकी थिइन्। त्यस क्रममा उनले बस्नेतले पत्रकारिता र साहित्य दुवै क्षेत्रमा पुर्याएको योगदानको प्रशंसा गरिन्।
त्यस्तै, मेयर माबुहाङ र विशेष अतिथि सुब्बाले पनि संकटका समयमा सत्य उजागर गर्ने बस्नेतको पत्रकारिता र सामाजिक यथार्थलाई उजागर गर्ने लेखन शैलीको उच्च प्रशंसा गरेका थिए।
पुरस्कार समिति अनुसार, ‘सिमसारा’ पछिल्लो समयको सामाजिक यथार्थवादी उपन्यास भएकाले यसलाई विमल गुरुङ कृति पुरस्कार–२०८१ का लागि चयन गरिएको हो।
