इलामको माङसेबुङ गाउँपालिका–४ स्थित विद्या सिर्जनात्मक माध्यमिक विद्यालयमा सहायक प्रधानाध्यापक हुँदाहुँदै कनिष्ठ शिक्षकलाई निमित्त प्रअ बनाइएपछि विवाद चुलिएको छ। तत्कालीन प्रधानाध्यापक देवीरमण ढकालले अवकास अघि कनिष्ठ शिक्षक रामप्रसाद आचार्यलाई निमित्त प्रअको जिम्मेवारी दिएका थिए।
सहायक प्रअ शक्तिकुमार साम्बासहित तीन वरिष्ठ शिक्षकले शिक्षा ऐन र नियमावली विपरीत नियुक्ति भएको भन्दै विद्यालय व्यवस्थापन समितिसमक्ष चार बुँदे ध्यानाकर्षणपत्र बुझाएका छन्। उनीहरूले वरिष्ठताका आधारमा निमित्त प्रअ नियुक्त गर्न माग गरेका छन्।
विद्यालय व्यवस्थापन समिति अध्यक्ष नविन योङहाङले विधि र पद्धतिअनुसार निर्णय हुने बताए। शिक्षा शाखा प्रमुख बुद्धिप्रसाद खतिवडाले समस्या विद्यालयकै आन्तरिक भएको जनाए।
उता निमित्त प्रअ आचार्यले शिक्षा शाखाको अनुरोधमा जिम्मेवारी सम्हालेको बताए भने स्थानीयले नियुक्तिलाई षड्यन्त्रपूर्वक गरिएको दाबी गरेका छन्।
