इलामको सूर्योदय नगरपालिका ८ स्थित श्री सिद्ध आधारभूत विद्यालयमा मङ्सिर १३ गते शनिबार बृहत् सांस्कृतिक कार्यक्रम भव्य रूपमा सम्पन्न गरिएको छ। विद्यालयको भौतिक तथा शैक्षिक सुधारका उद्देश्यले आयोजना गरिएको सो सांस्कृतिक कार्यक्रममा विद्यार्थीहरूको कला–प्रतिभा प्रदर्शनसँगै अभिभावक तथा सरोकारवालाको उल्लेखनीय सहभागिता रह्यो।
कार्यक्रमका प्रमुख अतिथि सूर्योदय नगरपालिकाका नगरप्रमुख रणबहादुर राई रहनुभएको थियो । कार्यक्रममा वडा नम्बर ८ का वडा अध्यक्ष जंग बहादुर गुरुङ तथा वडा सदस्यहरूको समेत सक्रिय उपस्थिति थियो।
कार्यक्रमलाई सम्बोधन गर्दै नगरप्रमुख राईले औपचारिक शिक्षासँगै अतिरिक्त कलाको महत्व झनै बढ्दै गएको बताउनुभयो। “आज एआइको जमाना आइसकेको छ, अब नानीबाबुहरूमा सिर्जनात्मकता, खोज -अनुसन्धान र प्राविधिक सीप थप आवश्यक छ,” उहाँले भन्नुभयो। साथै नगरपालिकाले विद्यार्थीको चौतर्फी विकासमा निरन्तर लगानी गरिरहेको उल्लेख गर्दै अभिभावकहरूको सक्रिय सहभागिता अपरिहार्य रहेको पनि बताउनुभयो।
विद्यालय परिवारको आयोजनामा सम्पन्न सो कार्यक्रममा स्थानीय प्रतिनिधि, विभिन्न विद्यालयका प्रतिनिधि, अग्रज कलाकार, पूर्वप्रधानाध्यापक तथा शिक्षक, विद्यालय व्यवस्थापन समिति, शिक्षक–अभिभावक संघ, शिक्षक कर्मचारी, अभिभावक तथा विद्यार्थीहरूको उत्साहजनक उपस्थिति थियो।
कार्यक्रमलाई सफल बनाउन सहयोग गर्ने सबैप्रति विद्यालय परिवारले हार्दिक कृतज्ञता व्यक्त गरेको छ। विशेषगरी नगरप्रमुख रणबहादुर राई, वडा नं। ८ का जनप्रतिनिधि, टोल विकास संस्था, अग्रज कलाकार, विद्यालय व्यवस्थापन समिति, अभिभावक तथा समुदायप्रतिको सक्रिय भूमिकालाई विद्यालयले सराहना गरेको छ।
विद्यालयको भनाइअनुसार सहभागीहरूको जोस, जाँगर र उत्साहले कार्यक्रम सफल मात्र नभई आगामी दिनमा विद्यालयको शैक्षिक तथा भौतिक सुधारका योजनामा थप प्रेरणा मिलेको छ।
