डायमण्ड तिम्सिना :- रोङ , इलाम
रोङ गाउँपालिका–३ स्थित सिद्धदेवी मन्दिर र पर्यटकीय स्थल हाँसपोखरी क्षेत्रमा धार्मिक पर्यटनको विस्तारसँगै स्थानीयको आर्थिक जीवनस्तरमा उल्लेखनीय परिवर्तन आएको छ।
यस क्षेत्रमा हाल करीब ५० परिवारले पूजा सामग्रीका पसल सञ्चालन गरी जीविकोपार्जन गर्दै आएका छन् भने १० वटा होटल व्यवसाय समेत सञ्चालनमा रहेका छन्। मन्दिरमा दर्शन गर्न आउने भक्तजनले पाथिभारा दर्शन अघि सिद्धदेवी माताको पूजा गर्ने परम्परा रहेकोले वर्षैभरि यहाँ दर्शनार्थी र पर्यटकको आवागमन बाक्लो हुने गरेको छ।
धार्मिक महत्वसहित यहाँको रमणीय हाँसपोखरी पनि आन्तरिक तथा बाह्य पर्यटकको प्रमुख आकर्षण बन्दै गएको छ। पर्यटनसँगै यस क्षेत्रमा पूजा सामग्री, तरकारी, फलफूल र होटल व्यवसाय विस्तार भएपछि स्थानीय युवाले रोजगारी पाउने अवसर बढेको छ।
स्थानीय व्यापारीहरूले यस क्षेत्रलाई धार्मिक पर्यटनको उत्कृष्ट उदाहरणका रूपमा वर्णन गरेका छन्। उनीहरूका अनुसार यहाँको व्यापारिक गतिविधिले स्थानीय उत्पादनको खपत बढाउने र स्थायी आयको स्रोत सिर्जना गर्ने अवसर प्रदान गरेको छ।
उता, रोङ गाउँपालिकाले व्यवसाय प्रवर्द्धनका लागि सुविधा सम्पन्न व्यापारिक भवन र स्टल निर्माण गरेर व्यवस्थित व्यापारिक वातावरण तयार पार्ने कार्य अघि बढाएको छ। यसले निकट भविष्यमै सिद्धदेवी क्षेत्रको कुल व्यापारिक गतिविधि अझ सुदृढ र दिगो बन्ने अपेक्षा गरिएको छ।
