सुर्योदय नगरपालिका–२, पशुपतिनगरबाट मंगलबार “प्रविधिको सही प्रयोग गरौँ, लैङ्गिक हिंसा अन्त्य गरौँ” भन्ने मूल नारासहित १६ दिने लैङ्गिक हिंसा विरुद्धको अभियान औपचारिक रूपमा सुरु गरिएको छ।
कार्यक्रमको अध्यक्षता सुर्योदय नगरपालिका महिला बालबालिका शाखाकी प्रमुख तारा शेर्पाले गर्नुभएको थियो भने प्रमुख अतिथिका रूपमा वडा नं। २ का अध्यक्ष डिक बहादुर बम्जन उपस्थित हुनुभएको थियो। उद्घाटन कार्यक्रममा इलाका सशस्त्र प्रहरी प्रमुख बाबुराम थापा, इलाका प्रहरी प्रमुख प्रवीण जोसी ज्ञवाली, सीमा प्रशासन प्रमुख डिक दाहाल, माइती नेपाल पशुपतिनगरका प्रमुख होम ढकाल, समाजसेवी सोइजन शेर्पा लगायत स्थानीय निकाय, सुरक्षा निकायका प्रतिनिधि तथा सरोकारवाला संस्थाका प्रतिनिधिहरूको उपस्थिति रहेको थियो।
वक्ताहरूले प्रविधिको दुरुपयोगका कारण बढ्दै गइरहेको लैङ्गिक हिंसा रोकथामका लागि जिम्मेवारीपूर्वक डिजिटल प्रयोग तथा समुदायस्तरमा जनचेतना विस्तार गर्नु आजको आवश्यकता रहेको उल्लेख गरे। सुर्योदय नगरपालिकाले १६ स्थानमा १६ फरक–फरक गतिविधिसहित १६ दिनसम्म अभियान सञ्चालन गर्ने जनाएको छ। गतिविधिहरूमा जनचेतनामूलक रैली, विद्यालय तथा समुदायगत अभिमुखीकरण, अन्तरक्रिया, साँस्कृतिक कार्यक्रम, प्रशिक्षण तथा प्रविधि–सुरक्षा सम्बन्धी सचेतनामूलक सन्देश प्रसारजस्ता कार्यक्रम समावेश रहनेछन्।
यो अभियान इलाका सुरक्षा निकाय, माइती नेपाल पशुपतिनगर तथा विभिन्न संघ–संस्थाको समन्वयमा सुर्योदय नगरपालिका महिला बालबालिका शाखाद्वारा आयोजना गरिएको हो। अभियानले स्थानीय समुदायमा लैङ्गिक हिंसा न्यूनीकरण तथा समानता प्रवर्द्धनमा सशक्त प्रभाव पार्ने अपेक्षा गरिएको छ।
