इलामको रोङ गाउँपालिकाले अभिभावकविहीन ३८ जना विद्यार्थीको पूर्ण अभिभावकत्व लिएको छ। यीमध्ये आमा–बुबा नभएका २१ जना र अभिभावकको साथ नभएका १७ जना विद्यार्थी समेटिएका छन्।
गाउँपालिकाले प्रत्येक विद्यार्थीका लागि ५ लाख रुपैयाँको जीवन बिमा र आमा–बुबा नभएका २१ जनाका लागि १ लाखको स्वास्थ्य बिमा गर्ने निर्णय गरेको छ। अभिभावकविहीन १७ जनाको उपचार भने गाउँपालिकाकै जिम्मामा रहनेछ।
विद्यार्थीलाई कक्षा १२ सम्म अध्ययन गराउने जिम्मा लिँदै गाउँपालिकाले प्रत्येकको नाममा नन–विथड्रवल बैंक खाता खोलेर वार्षिक १० हजार रुपैयाँ८८ जम्मा गर्नेछ। यस वर्ष सिद्धि हाईड्रोपावरले प्रति विद्यार्थी २० हजार थप सहयोग गर्नेछ।
विद्यार्थीसामाग्री प्याकेजमा कापी, कलम, ब्याग, स्विटर, ट्र्याकसुट, जुत्ता, क्यालकुलेटर, ज्यामिति बक्स, पानी बोतल र टिफिन बक्स उपलब्ध गराइनेछ।
सहयोगी दाताले सिधै विद्यार्थीको खातामा रकम हाल्न नपाउने व्यवस्था गरिएको छ। रकम मुख्य प्रशासकीय अधिकृत र शिक्षा शाखा प्रमुखको संयुक्त खातामा संकलन गरी कार्यपालिका निर्णय अनुसार सबैलाई बराबर वितरण गरिनेछ।
गाउँपालिकाले विगत दुई वर्षदेखि विद्यार्थीको दैनिक १ रुपैयाँ बचत कार्यक्रम सञ्चालन गर्दै आएको छ। प्राइम कमर्सियल बैंकमार्फत सञ्चालित यस योजनामा हाल २,०७३ विद्यार्थीले ५३ लाख ४ हजार ५३ रुपैयाँ बचत गरिसकेका छन्।
सबैभन्दा धेरै बचत गर्ने विद्यार्थी इशानी कुलुङ रहेको र उनको खातामा १ लाख ३ हजार ७२६ रुपैयाँ पुगेको जनाइएको छ।
उपस्थितिका आधारमा गाउँपालिकाले प्रत्येक तीन महिनामा विद्यार्थीको खातामा रकम जम्मा गरिरहेका छन्। विद्यार्थीले पनि दैनिक न्यूनतम एक रुपैयाँ वा मनलागे बढी बचत गर्न पाउने व्यवस्था छ।
