अजरबैजान एयरलाइन्सको एक विमान २५ डिसेम्बरमा काजाकस्तानमा दुर्घटनाग्रस्त हुँदा ३८ जनाको मृत्यु भएको छ। विमान आक्टाउ (Aktau) विमानस्थलको धावनमार्गबाट ३ किलोमिटर टाढा उच्च गतिमा खस्दा आगलागी भएको थियो। विमानले सुरुमा दक्षिणी रुसको ग्रोज्नी विमानस्थलमा अवतरण गर्ने प्रयास गरेको थियो, तर त्यहाँको जटिल परिस्थितिका कारण क्यास्पियन समुद्र पार गर्दै काजाकस्तानतर्फ मोडिएको थियो।
रुसको नागरिक उड्डयन एजेन्सीका प्रमुख दिमित्री याड्रोभले ग्रोज्नी र भ्लादिकाभकाजमा युक्रेनी ड्रोनद्वारा नागरिक पूर्वाधारमा आक्रमण भइरहेको र त्यसैले ग्रोज्नी विमानस्थलमा ‘कार्पेट योजना’ लागू गरिएको बताएका छन्। यसले सबै विमानलाई तत्काल क्षेत्र छोड्न निर्देशन दिएको थियो।
अजरबैजान एयरलाइन्सले प्रारम्भिक अनुसन्धानले ‘भौतिक र प्राविधिक बाह्य हस्तक्षेप’ का कारण दुर्घटना भएको जनाएको छ। यद्यपि, सरकारले रूसलाई प्रत्यक्ष आरोप लगाएको छैन। विमान चालक दलका सदस्य जुल्फुकार असादोभले विमान ‘बाह्य प्रहार’ बाट प्रभावित भएको र त्यसपछि अर्को प्रहार हुँदा आफ्नो हातमा चोट लागेको बताएका छन्।
सुरक्षाका कारण अजरबैजान एयरलाइन्सले ग्रोज्नी र माखाचकाला सहित सात रूसी शहरहरूमा उडानहरू निलम्बन गरेको छ। यसैबीच, इजरायली वायुसेवा एल अलले पनि रूसी हवाई क्षेत्रको परिस्थितिलाई ध्यानमा राख्दै मस्कोका उडानहरू स्थगित गरेको छ।
युक्रेनी राष्ट्रपतिको कार्यालयले रूसलाई दुर्घटनाको लागि जिम्मेवार ठहर गर्नुपर्ने बताएको छ, जबकि क्रेमलिनले यसबारे कुनै टिप्पणी गरेको छैन।
स्रोत: BBC News
