इलाम सूर्योदय नगरपालिका१३ का तिलक राई र विनिता राईका नवजात शिशुको उपचार खर्च जुटाउन गरेको अपिलपछि युथ ग्रुपले ५१ हजार ९५० रुपैयाँ आर्थिक सहयोग हस्तान्तरण गरेको छ। आर्थिक रूपले कमजोर परिवारले गरेको आग्रहलाई सकारात्मक रूपमा लिँदै समूहले विभिन्न स्रोतबाट संकलन गरिएको रकम औपचारिक रूपमा हस्तान्तरण गरेको हो।
उपचार खर्च अभाव भएपछि परिवारजनले युथ ग्रुपसँग सहयोगको याचना गरेका थिए । संकलित रकम हिजो आयोजित एक समारोहमार्फत परिवारलाई बुझाइयो। कार्यक्रममा युथ ग्रुपका पदाधिकारी र सदस्यहरूको सक्रिय उपस्थिति रहेको थियो।
सो अवसरमा युथ ग्रुपका अध्यक्ष प्रविन बिसीले समूह सधैं असहाय, पीडित र निमुखा नागरिकको सेवामा समर्पित रहने बताउनुभयो। उहाँले यसअघि कोलबाट निवासी प्रेम लिम्बुको उपचारका लागि पनि आर्थिक सहयोग उपलब्ध गराएको स्मरण गर्दै, युथ ग्रुप कुनै आर्थिक स्वार्थविना सेवा–मनका साथ समाजमा काम गर्ने समूह भएको स्पष्ट पार्नुभयो।
अध्यक्ष बिसीले हस्तान्तरण गरिएको रकम उपचारका लागि मात्र पारदर्शी ढंगले उपयोग गर्न परिवारलाई आग्रह गर्नुभयो। यदि रकमको दुरुपयोग भएमा समूहले आवश्यक कारबाही गर्ने चेतावनी पनि दिनुभयो।
कार्यक्रम चन्द्र कार्की ‘डोलीज्यू’को सञ्चालनमा सम्पन्न भएको थियो भने युथ ग्रुपका प्रचारप्रसार संयोजक गुरु कटेलले कार्यक्रमका बारेमा जानकारी गराएका थियो।
