लाप्चा जातिको ऐतिहासिक पृष्ठभूमि बोकेको इलामका अधिकांश पूर्वी क्षेत्रहरूमा लाप्चा भाषाको प्रभाव अझै बलियो रूपमा देखिन्छ। हालका प्रमुख पर्यटकिय स्थलहरू अन्तु, फिक्कल, कन्याम लगायतका स्थानहरूको नाम पनि ऐतिहासिक कालमा लाप्चा भाषाबाटै राखिएको मानिन्छ। विभिन्न चरणका राजनीतिक परिवर्तनसँगै बनेका संरचना र स्थाननामहरू अहिले पनि लाप्चा संस्कृतिसँग गहिरो सम्बन्ध राख्छन्।
यस्तै उदाहरणका रूपमा रोङ गाउँपालिकालाई लिन सकिन्छ, जहाँ धेरै स्थान र बाटोहरूको नाम लाप्चा भाषाबाटै नामकरण गरिएको छ। पछिल्लो समय जैविक विविधता, कृषि अध्ययन र पदयात्राका लागि लोकप्रिय बन्दै गएको करसोङ पदमार्ग पनि लाप्चा भाषाकै नाम हो। करसोङ शब्दको अर्थ लाप्चा भाषामा सुनाखरी फूल भन्ने हुन्छ।
मेचि राजमार्गको छेउमा पर्ने गिद्धे भीर, गुराँसे डाँडा, गुगल पोइन्टलगायतका वन क्षेत्रहरूमा सुनाखरी फूल प्रशस्त पाइने भएकाले नै यस पदमार्गको नाम ८करसोङ८ राखिएको रोङ–३ का वडा अध्यक्ष मात्रिका बरालले जानकारी दिनुभयो।
यस पदमार्गलाई दीर्घकालीन रूपमा कसरी सञ्चालन र प्रवर्द्धन गर्ने भन्ने उद्देश्यले शुक्रबार प्रदेश सांसद तथा पूर्वमन्त्री संशेर राई, नेपाली कांग्रेस कोशी प्रदेश सचेतक तथा झापा क्षेत्रका सांसद गोपाल तामाङ सहितको टोलीले करसोङ पदमार्गको अध्ययन अवलोकन भ्रमण गरेको हो।
१९ किलोमिटर दूरी पार गर्दै टोलीले पदमार्गको अवस्थाबारे प्रत्यक्ष जानकारी लिँदै व्यवस्थापन तथा पूर्वाधार विकासका सम्भावनामाथि छलफल गरेको थियो। सांसद राईले करसोङ पदमार्गलाई दिगो बनाउन प्रदेश सरकारको आगामी बजेटमा प्राथमिकता दिन आवाज उठाउने प्रतिबद्धता जनाउनुभयो।
अवलोकन टोलीमा इलाम नगरपालिकाका वडा अध्यक्षहरू दिलीप प्रधान, नरेश श्रेष्ठ, दलमान तामाङ, रोङ गाउँपालिकाका वडा अध्यक्षहरू मनोहरी खड्का, मात्रिका बराल, सूर्यदय–७ का वडा अध्यक्ष लालबहादुर चाम्लिङ राई लगायत अन्य जनप्रतिनिधि र सरोकारवालाहरूको सहभागिता रहेको थियो।
गत मंगलबार मात्र रोङ गाउँपालिकाका अध्यक्ष मनिकुमार स्याङ्बोको संयोजकत्वमा पदमार्गमा वृहत् श्रमदान तथा सरसफाइ अभियान सम्पन्न गरिएको थियो। स्थानीय तह, जनप्रतिनिधि र सरोकारवालाको सामूहिक प्रयासमा करसोङ पदमार्गलाई प्रदेशकै आकर्षक र दिगो पदयात्रा मार्गका रूपमा विकास गर्ने प्रयास जारी छ।
