इलामको सूर्योदय नगरपालिका–१० फिक्कल बजारमा आइतबार ‘हुनेले दिने, नहुनेले लिने’ नाराका साथ कपडा बैंक स्थापना गरी औपचारिक रूपमा उद्घाटन गरिएको छ। सिनियर टिम फिक्कलको पहलमा स्थापित कपडा बैंकको उद्घाटन सूर्योदय नगरपालिकाका उपप्रमुख दुर्गाकुमार बरालले गर्नुभयो।
जाडोयाममा लुगाको अभाव झेलिरहेका विपन्न नागरिकलाई सहयोग पुर्याउने उद्देश्यले सुरु गरिएको कपडा बैंकमा घर–परिवारमा प्रयोगमा नरहेका कपडाहरू डोनेसन गर्न नगरवासीलाई आह्वान गरिएको छ।
कार्यक्रममा उपप्रमुख बरालले गरिबीको रेखामुनी रहेका नागरिकका लागि कपडा बैंक उपयोगी र राहतदायी साबित भएको बताउनुभयो।
कपडा बैंकका संयोजक राजन प्रधानका अनुसार निकट भविष्यमा यसलाई कानुनी रूपमा दर्ता गरी दिगो रूपमा सञ्चालन गरिनेछ। बैंक दैनिक रूपमा खुला रहनेछ र आवश्यकताअनुसार नागरिकहरूले निःशुल्क कपडा लैजान सक्ने व्यवस्था गरिएको सिनियर टिम फिक्कलका सदस्य शरण फागोले जानकारी दिनुभयो।
स्थानीयहरूले कपडा बैंकबाट कपडा लिन सुरु गरिसकेका छन्। समाजसेवामा सक्रिय सिनियर टिम फिक्कलले यसअघि पनि रक्तदान, बाढी–पहिरोमा श्रमदानलगायत विभिन्न सामाजिक गतिविधि सञ्चालन गर्दै आएको छ।
